Վիետնամի Սոցիալիստական Հանրապետության Անկախության օրվա 76-ամյակին նվիրված պաշտոնական տոնակատարությունը:

02 սեպտեմբերի, 2021

Ս.թ. սեպտեմբերի 2-ին հեռահար ձևաչափով կայացավ Վիետնամի Սոցիալիստական Հանրապետության Անկախության օրվա 76-ամյակին նվիրված պաշտոնական տոնակատարությունը։

Վիետնամի Սոցիալիստական Հանրապետության Անկախության օրվա 76-ամյակի կապակցությամբ ելույթով հանդես եկավ Վիետնամի Սոցիալիստական Հանրապետության վարչապետ Ֆամ Մին Չինը (Pham Minh Chinh):

Իր ելույթում ՎՍՀ վարչապետ Ֆամ Մին Չինը համառոտ ներկայացրեց Վիետնամի Սոցիալիստական Հանրապետության 76–ամյա անկախության անցած ճանապարհը։ Վիետնամի վարչապետը կարևորեց ու ամփոփեց վերջին 35 տարիների ընթացքում իրականացվող տնտեսական բարեփոխումների (Doi Moi) արդյունքները՝ նշելով, որ Վիետնամն աղքատ երկրից վերածվել է ՄԱԿ-ի կողմից Հազարամյակի զարգացման նպատակների (Millennium Developing Goals) ծրագիրն իրականացնող առաջատար երկրներից մեկը։

ՎՍՀ վարչապետ Ֆամ Մին Չինն ընդգծեց և կարևորեց Վիետնամի կոմունիստական կուսակցության դերը երկրի կողմից ներքին ու արտաքին հավասարակշռված քաղաքականությունն իրականացնելիս։

Վիետնամի վարչապետն իր ելույթում անդրադարձավ նաև ներկայումս աշխարհում COVID-19 համավարակի տարածման և կլիմայի փոփոխության խնդիրներին։

Հանդիպման վերջում Վիետնամում հավատարմագրված դեսպանների և միջազգային կազմակերպությունների մշտական ներկայացուցիչների անունից ողջույնի խոսքով հանդես եկավ դիվանագիտական կորպուսի դուայենը՝ Պաղեստինի դեսպան Սաադի Սալաման:

Վիետնամի Սոցիալիստական Հանրապետության Անկախության օրվա 76-ամյակին նվիրված հեռահար ձևաչափով անցկացվող պաշտոնական տոնակատարությանն, ի թիվս Վիետնամում հավատարմագրված այլ դեսպանների և միջազգային կազմակերպությունների մշտական ներկայացուցիչների, մասնակցում էր նաև ՎՍՀ-ում ՀՀ դեսպան Վահրամ Կաժոյանը (Vahram Kazhoyan):

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր